Sumaro Bikolnon, Inc.

An Sumarò Bikolnon Inc. o Sumarò sarong kaburunyogán nin mga parasurat, parakanta asín mga parasaligsíg na nag-eerok sa probinsya nin Camarines Sur. Tinogdas iní kan Desyembre 9, 2007 sa Madrigal Foundation Bldg., Ateneo de Naga na Unibersidad asín naipagúhit sa SEC kan Marso 4, 2008.

Si Ramon Olaño Jr. an presenteng Pamayo. An mga kaapíl kan kaburunyogan iyo sinda Jose Fernando Obias (dating Pamayo), Estelito Jacob, Fabiana Arejola, Jose Barrameda Jr. (dating Pamayo), Fr. Wilmer Joseph Tria, Carlos Arejola, Ben Barrameda, Dr. Danilo Gerona, Kristian Cordero, Gian Paolo Priela, Carlos Salcedo Jr., Clodualdo Ceron siring man sinda Bernard Miguel Aguay, Jerome Hipolito, Sheila Basbas, Gil Gregorio, D.C. Nathan Sergio, H. Frank Peñones, Jason Chancoco, Irvin Sto. Tomas, Jan Kevin de Quiroz, Jusan Misolas, Bert de los Martirez, Ernie Verdadero, Bernadette Roco, Rommel Alanis, Kenneth Orasa asin iba pa.

An minasunod iyo an paghingoa kan kaburunyogán:
1. Magbantay, mag-adal asín magpauswag kan tataramon na Bikol
2. Mag-andoróg sa mga parasurat sa tataramon na iní asín magmuknâ nin mga programa sa pag-agyát na dumakol an nagsusurat sa Bikol
3. Magtípon asín magrimpós kan mga historia sa ronang Bikol
4. Magtìmos asín magpabantóg kan mga awit-banwaan kan ronâ
5. Magtaong insentibo sa mga Bikolano na magkompos nin mga kantang Bikolnon
6. Magsaray asín magpreserba kan mga artifacts, mga monumento asín mga bagay arkiyolohikos
7. Magin antabay asín hadoyan kan arinman na institusyon, pribado o publiko, sa mga bagay na kultural
8. Maggíbo nin ano man na lakdang na an kulturang Bikolnon magdanay, maglakop, magtalubò asín magrambong

Yaon sa Abella, Syudad nin Naga an opisina kan grupo.